Një derë e blinduar, e fshehur pas një muri të rremë, është zbuluar gjatë kontrollit në vilën luksoze të ish-presidentit të Paraguait, Santiago Peña. Prokurorët dhe policia kontrolluan të dielën, më 8 nëntor, rezidencën verore në San Bernardino, rreth 50 kilometra nga kryeqyteti Asunción, në kuadër të hetimeve për kolapsin e Ueno Bank.
Sipas gazetës paraguajane ABC Color, dera kishte një sistem sigurie me kod digjital dhe njohje të fytyrës. Mediat vendase raportuan se ajo mund të çojë në një kasafortë. Hetuesit nuk arritën ta hapnin gjatë kontrollit dhe mbetet e paqartë se çfarë ndodhet pas saj.
Vetë financimi i vilës është pjesë e hetimit. Sipas prokurorisë, në maj të vitit 2024, Ueno Bank i dha Peña-s dy kredi me vlerë të përgjithshme rreth 577 mijë dollarë për ndërtimin e saj. Kësti mujor i kredive arrinte në afro 39 mijë dollarë, sa gjashtëfishi i pagës së tij si president.
Prokurorët dyshojnë se Peña përdori postin për të ndikuar që institucionet shtetërore të mbanin fonde publike në bankë. Sipas Reuters, ai kishte qenë aksioner i grupit që zotëronte Ueno Bank deri në mars të vitit 2025. Ish-presidenti i ka mohuar akuzat.
Senati e shkarkoi Peña-n më 6 nëntor, pas një gjyqi politik. Një ditë më vonë, gjykata urdhëroi mbajtjen e tij në paraburgim në një njësi ushtarake. Presidencën e mori zëvendëspresidenti Pedro Alliana, ndërsa kolapsi i bankës bllokoi fondet e afro 3 milionë klientëve, përfshirë edhe institucione shtetërore.
