Prokuroria e Posaçme përfundoi hetimet dhe dorëzoi për gjykim dosjen ndaj tre të pandehurve për trafik narkotikësh.
Ata akuzohen për trafik narkotikësh, kryer në kuadër të grupit kriminal në pesë episode përgjatë 2023-2024. Zabit alias Artur Fisniku dhe Fabi Isaku, akuzohen për trafik droge kryer në kuadër të grupit kriminal në 3 episode. Tre të pandehurit dyshohen si pjesë e një grupi kriminal që trafikonte drogë në Francë.
Nga autoritetet e drejtësisë franceze rezulton se ishin identifikuar dhe më pas dënuar shtetasit shqiptarë, Martin Toluli, Emri Azonlay (Kola), Orges Doka dhe Indrit Murati. Ndërsa më 18 qershor 2024 janë arrestuar po në Francë Dorjan Titini dhe Ergys Visha. Tre të pandehurit Redian alias Refik Doda, Zabit alias Artur Fisniku dhe Fabi Isaku, akuzohen si bashkëpunëtorë në këtë grup kriminal, por ndërkohë ndodheshin në Shqipëri.
Gjykata e Specializuar Ndër-rajonale në Lyon ka vijuar hetimet lidhur me një çështje të trafikut të drogës dhe, bazuar në mbikëqyrjen e realizuar nga Brigada e Kërkimit në Albertville nën drejtimin e prokurorisë së Albertville, është zbuluar se automjete të ndryshme po përdoreshin nga disa të hetuar për të furnizuar me drogë pikat e tregtimit dhe për të grumbulluar paratë e trafikut të kokainës. Bëhet fjalë për udhëtime në Belgjikë, Itali dhe Holandë. Nga hetimet rezultoi se i pandehuri kryesor i këtij grupi ndodhej në Shqipëri dhe zotëronte një lokal. Një pjesë e parave të trafikut të drogës dërgoheshin në Shqipëri, të tjera në Holandë. I pandehuri kryesor kishte caktuar një ndërmjetës që qëndronte në zonën e Lyonit në Francë për disa muaj përpara se të kthehej në Shqipëri. I pandehuri kryesor Redian alias Refik Doda konsiderohej si personazhi kryesor dhe nuk kishte udhëtuar asnjëherë në Francë. Kontaktet me të dyshuarit e tjerë i mbante ndërmjetësi. Nga hetimet është zbuluar se droga trafikohej jo vetëm në rajonin francez Auvergne Rhone Alpes, por edhe në Holandë, Belgjikë, Itali, Zvicër dhe Shqipëri. Nga hetimet rezulton se Redian alias Refik Doda ka pasur gjithmonë një rol në rritje në organizimin e grupit kriminal. Fabi Isaku dhe Dorjan Titini ndiqnin direktivat e dhëna nga i pandehuri Redian alias Refik Doda, që ndodhej në Shqipëri. Doda përdorte numër spanjoll dhe shqiptar, ku edhe është përgjuar nga autoritetet. Rezulton se telefonatat janë kryer prej tij në territorin shqiptar dhe jo atij francez. Zabit Fisniku rezulton i implikuar në trafik droge. Ai rezulton me kartë kërkimi në zonën Shengen, pasi ishte dëbuar me motivin për prishje të rendit apo qetësinë publike. Fisniku njihej nga shërbimet e xhandarmërisë për përfshirje në trafik droge. Kokaina vinte nga Belgjika dhe ai e tregtonte atë në zona me pemë, me qëllim që t’u shmangej kamerave. Paratë e përfituara nga shitja e drogës transportoheshin në Shqipëri e Belgjikë. Disa nga anëtarët e grupit kriminal që drejtohej nga Shqipëria nga Redian Doda, merrnin detyra edhe për të importuar drogë në vendet e ulëta.
Në një nga bisedat e përgjuara mes të pandehurit Fabi Isaku dhe një personi të panjohur, Isaku shprehet: “Çdo klan ka një idiot, për ne është Aleksi.” Fabi Isaku shpjegon se Aleksi është përdorues shumë i madh i lëndëve narkotike.
“Ai i ka dhënë mall me cilësi të mirë, mes 3 dhe 4 gramëve një mëngjes rreth orës 6. Aleksi i ka konsumuar të gjitha deri në mesditë,” dëgjohet të thotë ai. Ai flet edhe për paratë që transportohen në Shqipëri. “Kur çoj paratë në Shqipëri i vendos në një kuti për pizza dhe i vë dorën sipër dhe vë tiktok,” dëgjohet të thotë ai. Redian alias Refik Doda përgjohet teksa e këshillon Isakun që nëse ka dyshimin më të vogël, duhet ta marrë në telefon. Në një nga episodet Fabi Isaku shkon në kufirin zvicerian, merr 2500 euro. Ai – thuhet në dosje – i dorëzon 100 flamurë dhe 350 bojë. Klienti ankohet se donte më pak produkt për përzierje.
Ai telefonon Redian alias Refik Dodën dhe e pyet nëse duhet t’i dërgojë një fotografi për të verifikuar. Rediani e pyet nëse ka ndonjë problem me plastikën, nëse ajo është e hapur. Fabi Isaku i thotë jo dhe se i ka dërguar foto. Dosja me qindra biseda të përgjuara, si dhe prova të tjera, është dorëzuar tashmë për gjykim dhe po shqyrtohet në seancë paraprake nga Gjykata e Posaçme.
