Ministria britanike e Mbrojtjes ka nisur një hetim pas raportimeve se një anije luftarake ruse ka qëlluar pranë një jahti të regjistruar në Mbretërinë e Bashkuar, në Kanalin Anglez.
Sipas mediave britanike, incidenti ka ndodhur rreth orës 11:40 të së martës, në zonën mes Ishullit të Uajtit dhe brigjeve të Normandisë. Në ngjarje dyshohet të jetë përfshirë fregata ruse “Admiral Grigorovich”.
“Po hetojmë raportimet për një incident në Kanal”, deklaroi shkurt një zëdhënës i Ministrisë së Mbrojtjes.
Burime zyrtare bëjnë me dije se jahti britanik ka raportuar se anija ruse ka qëlluar nga një distancë prej rreth 500 jardësh (457 metra), duke ngritur shqetësime për sigurinë në zonë. Fatmirësisht, nuk raportohet për të lënduar apo dëme materiale.
Ngjarja ka ndodhur rreth 20 milje detare në jug të Ishullit të Uajtit, jashtë ujërave territoriale britanike.
Ky incident vjen vetëm pak ditë pasi forcat elitare të Marinës Mbretërore britanike ndaluan një cisternë të “flotës në hije” ruse që transportonte naftë të sanksionuar, një operacion i paprecedentë për ushtrinë britanike.
Megjithatë, zyrtarët në Londër theksojnë se nuk ka prova që lidhin dy ngjarjet.
Anijet ruse kalojnë shpesh në Kanalin Anglez dhe monitorohen vazhdimisht nga marina britanike. Sipas raportimeve, fregata “Admiral Grigorovich” po ndiqej nga anija britanike HMS Mersey në momentin e incidentit.
Ndërkohë, një ditë më parë, Marina britanike bëri të ditur se e njëjta anije ruse ishte monitoruar gjatë fundjavës nga HMS Tyne dhe HMS Mersey, në kuadër të një operacioni rutinë.
