Moderatori i emisioneve të natës vonë Jimmy Kimmel është justifikuar për një batutë të tijën ndaj Melania Trump, vetëm pak ditë pasi një person i armatosur hapi zjarr gjatë darkës së Shoqatës së Korrespondentëve të Shtëpisë së Bardhë në Uashington.
Zonja e parë e cilësoi skeçin e transmetuar të enjten e kaluar si “të mbushur me urrejtje dhe dhunë”, ndërsa Shtëpia e Bardhë i bëri thirrje rrjetit televiziv ABC që të shkarkojë komedianin.
Tre ditë më vonë, një person i armatosur hapi zjarr gjatë darkës së gazetarëve në Uashington, ku presidenti Donald Trump kishte marrë pjesë së bashku me Melania Trump. Autoritetet kanë deklaruar se sulmi mund të ketë pasur si objektiv anëtarë të administratës Trump.
Në batutën që shkaktoi polemika, Kimmel tha gjatë emisionit të tij: “Zonja e parë, Melania, është këtu. Shikoni sa e bukur është. Znj. Trump, ju keni një shkëlqim si i një vejushe në pritje.”
Në monologun e parë në “Jimmy Kimmel Live!” pas incidentit, komediani tha se bëhej fjalë për një shaka të lehtë që lidhej me diferencën 23-vjeçare në moshë mes presidentit dhe bashkëshortes së tij.
“Nuk ishte në asnjë mënyrë një thirrje për atentat dhe ata e dinë këtë. Kam qenë prej vitesh shumë i zëshëm kundër dhunës me armë”, u shpreh ai.
Melania Trump reagoi të hënën në platformën X duke shkruar se “njerëz si Kimmel nuk duhet të kenë mundësinë të hyjnë çdo mbrëmje në shtëpitë tona për të përhapur urrejtje”.
Edhe Donald Trump reagoi në rrjetin Truth Social, duke thënë se komentet e Kimmel ishin “një thirrje për dhunë” dhe se komediani duhet të shkarkohet menjëherë nga ABC dhe kompania Disney.
Presidenti dhe zonja e parë u evakuuan pa u lënduar nga darka e zhvilluar në hotelin Washington Hilton, pasi një person i armatosur hapi zjarr pranë një pike sigurie të aktivitetit.
I dyshuari, i identifikuar si 31-vjeçari Cole Tomas Allen, u neutralizua nga agjentët pranë një shkalle që të çonte drejt sallës ku po zhvillohej darka me qindra gazetarë, zyrtarë dhe figura publike.
Allen u paraqit të hënën para gjykatës, ku u akuzua për tentativë për atentat ndaj presidentit dhe për disa shkelje që lidhen me armët. Ai nuk paraqiti deklarim fajësie.
