Ministri i Turizmit, Kulturës dhe Sportit, Blendi Gonxhja, ka zgjedhur të rikthejë në kujtesë tortën e famshme të 100-vjetorit të Pavarësisë për të shpjeguar një nga veprimet më të pazakonta të autoriteteve gjatë protestave në Tiranë: heqjen e gurëve të trotuareve në bulevard.
Në një intervistë për emisionin “Off the Record” të Andrea Dangllit në A2CNN, Gonxhja argumentoi se ndërhyrja e Bashkisë së Tiranës ishte e nevojshme për t’u hequr protestuesve mundësinë e përdorimit të gurëve si armë të ftohta.
“Nuk mund të kthehet dot bulevardi dhe anët e tij në një tortë pavarësie”, deklaroi ministri, duke krahasuar mënyrën se si protestuesit grumbullonin gurët në kova me skenat e dikurshme të qytetarëve që merrnin copa nga torta gjigante e Pavarësisë.
Sipas Gonxhes, pamjet filmike dëshmojnë se gurët shpërndaheshin mes protestuesve për t’u përdorur si municion gjatë përplasjeve me policinë.
“Natyrisht që është heqje arme, heqja e gurëve”, u shpreh ai, duke garantuar qytetarët se trotuaret e dëmtuara do të rimozaikohen nga ustallarët.
Kështu, pas ditësh protestash, ministri gjeti rastin të flasë për bulevardin historik, gurët e tij dhe tortën e Pavarësisë. Për tortën e pushtetit, ndërkohë, nuk pati ndonjë koment.
