Sali Berisha ka përgënjeshtruar veten sot lidhur me statusin e mbrëmshëm, ku akuzonte prokurorin e SPAK, Olsi Dado, si të përfshirë në ngjarjen dhe lirimin e personit të dyshuar si vrasësin e djeshëm në Ndroq.
“Janë pjesë nga dosja e krimit, ku një nga emrat më të lakuar është Olsi. Nuk ishte Olsi Dado, edhe pse qytetari dixhital dhe portalet përmendnin Olsi Dadon,” – tha sot Sali Berisha në një konferencë për shtyp.
“Olsi Dado nuk është, nuk ka pasur të bëjë. Imagjinoni ju, reagojnë vetë mes të natës SPAK-u,” – tha kryetari demokrat me lehtësi të çuditshme, ndërkohë që mbrëmë ai dhe shumë media e përfshinë prokurorin Olsi Dado në një çështje të paqenë.
Me gjasë, Sali Berisha e di shumë mirë se kush është prokurori që ka lënë të lirë vrasësin e dyshuar të ngjarjes së mbrëmshme në Ndroq, por për arsye që ai i di mirë nuk e përmend emrin e tij.
