SPAK ka reaguar ndaj deklaratës së bërë sot nga ish-kryeministri Sali Berisha, i cili akuzoi prokurorin Ols Dado se kishte liruar kunatin e Altin Hajrit nga burgu. Prokuroria e Posaçme sqaron se informacionet e përmendura janë tërësisht të pavërteta dhe nuk kanë asnjë lidhje me prokurorin Dado.
SPAK i bëri thirrje mediave dhe publikut të jenë të kujdesshëm ndaj spekulimeve dhe apeloi për një trajtim të përgjegjshëm të informacionit nga politikanët dhe mediat.
“Prokuroria e Posaçme kundër Korrupsionit dhe Krimit të Organizuar përgënjeshtron deklaratën e sotme përmes të cilës aludohet se prokurori i posaçëm, Ols Dado “ka liruar nga burgu kunatin e Altin Hajrit”. SPAK sqaron se informacionet që janë përmendur në këtë deklaratë janë tërësisht të pavërteta dhe nuk kanë asnjë lidhje me prokurorin e përmendur. SPAK i bën thirrje mediave dhe opinionit publik të jenë të kujdesshëm ndaj informacioneve të pasakta dhe spekulative. SPAK apelon për një trajtim të përgjegjshëm dhe të balancuar të informacionit nga ana e përfaqësuesve politikë dhe mediave dhe nënvizon se do të vijojë punën pa asnjë kompromis në ruajtjen e integritetit dhe besueshmërisë së publikut në ushtrimin e funksioneve të tij” – thuhet në njoftimin e SPAK.
Reagimi i SPAK vjen pas postimit të Berishës, i cili, duke komentuar vrasjen në Ndroq, akuzoi prokurorin Dado për lirimin e autorit të krimit, Julian Gjishi, si dhe disa portaleve që kanë pasqyruar statusin e Berishës.
