Kreu i Partisë Demokratike, Sali Berisha, gjatë mbledhjes së Grupit Parlamentar të PD-së, reagoi ndaj kërcënimeve që sipas tij i janë bërë deputetes Marjana Koçeku, e njohur publikisht si Neomalësorja, e cila së fundmi u largua nga Partia Socialiste.
Berisha akuzoi drejtpërdrejt kryeministrin Edi Rama si përgjegjës për këto veprime, duke deklaruar se ai vepron sipas “ligjit të mafias” dhe jo sipas ligjit të shtetit.
Duke komentuar rastin e Koçekut, ai i cilësoi të papranueshme dhe të dënueshme kërcënimet ndaj deputetes, duke përsëritur akuzat se pas tyre qëndron kryeministri Rama.
Berisha adresoi kritika edhe ndaj ministrit të Financave, Petrit Malaj. Ai e konsideroi publikimin në Kuvend të listës së kompanive të deputetit Agron Shehaj si një akt shantazhi politik dhe kërkoi marrjen e masave ndaj ministrit.
Kryedemokrati ngriti gjithashtu akuza ndaj zyrtarëve të qeverisë, duke pretenduar se veprimet e tyre përbëjnë tejkalim të kompetencave dhe përdorim të institucioneve për qëllime politike.
Në fjalën e tij, lideri demokrat u bëri thirrje qytetarëve dhe mbështetësve të opozitës që t’i bashkohen protestës si individë të lirë dhe jo në emër të partive politike. Sipas tij, protesta përfaqëson një kauzë qytetare kundër korrupsionit, krimit dhe abuzimeve me pushtetin.
