Ish-kandidati i opozitës për Tiranën, Belind Këlliçi, ka deklaruar se protesta e fundit e opozitës nuk përmbushi pritshmëritë e tij, duke theksuar se duhej të ishte më e ashpër dhe më e fortë. Protesta u shoqërua me hedhje të dhjetëra bidonëve me molotov drejt institucioneve kryesore dhe përfundoi me 13 të lënduar në radhët e policisë dhe protestuesve.
Këlliçi theksoi se ky ishte vetëm akti i parë i një mosbindjeje civile që do të vijojë dhe do të intensifikohet. Ai paralajmëroi se aksionet do të përshkallëzohen, duke përfshirë të gjitha 12 qarqet e vendit dhe ndoshta edhe institucione ndërkombëtare si Parlamenti Europian.
“Nuk ishte brenda pritshmërive. Pritshmëritë ishin që protesta të ishte më e ashpër dhe më e fortë. Ishte akti i parë i mosbindjes civile. Në javët në vijim, aksioni do të zgjerohet gjeografikisht,” tha Këlliçi për A2 CNN.
Ai u shpreh gjithashtu se përballë një mazhorance që nuk zbaton vendimet e Gjykatës Kushtetuese dhe një “narkoshteti”, opozita nuk ka më alternativa përveç përplasjes. Këlliçi garantoi se protestat e ardhshme do të jenë edhe më të fuqishme, duke kërkuar zgjedhje të lira dhe të ndershme, e jo pushtet “në tavolinë”.
