Këshilli Bashkiak i Matit ka zgjedhur Myslym Zenelin si kryetar të komanduar të Bashkisë Mat deri në zgjedhjet e reja vendore. Ky vendim erdhi pas dorëheqjes së kryebashkiakut Agron Malaj, i cili do të kandidojë për deputet në Qarkun Dibër në zgjedhjet e 11 majit.
Nga 21 anëtarët e këshillit, 19 ishin të pranishëm në mbledhjen e jashtëzakonshme, ku me 17 vota Zeneli u zgjodh mes dy kandidatëve, ndërsa Flutura Biba mori vetëm një votë dhe një tjetër rezultoi e pavlefshme.
Ndërkohë, në Tepelenë është komanduar si kryetare e bashkisë nënkryetarja aktuale, Julinda Karteri.
Emrat e kandidatëve të PS për Qarkun Dibër pritet të shpallen gjatë Asamblesë së partisë në orën 19:00.
