Gjykata e Apelit të Posaçëm la në fuqi vendimin e GjKKO për Ilir Selmanin, i akuzuar si pjesë e grupit që ekzekutoi ish-policin, Santjago Malko.
Selmani do të vuajë 28 vite burgim. Ai ndodhej në masën e “arrestit në shtëpi” kur u firmos verdikti për të, pasi procesi zgjati gati 4 vite dhe afatet e paraburgimit humbën efektet.
Për vrasjen e Malkos janë dënuar në total me 130 vite burgim 5 të pandehur të tjerë që u gjykuan në një proces të ndarë. Leonard Duka që konsiderohet si kreu i klanit Duka u dënua me 30 vite burgim, ndërsa vëllai i tij Erlisi mori pafajësinë. Fatmir Hyseni, i akuzuar si ekzekutor në ngjarje, Aleksandër Maxhaku, Dritan Agaj dhe Oltjon Loga u dënuan me nga 25 vite burgim secili. Ndërsa në një proces të ndarë është cilësuar fajtor dhe dënuar Blendi Teta.
Malko u qëllua për vdekje në 2019 nga klani kriminal Duka i drejtuar nga Leonard Duka. Malko njihej si krahu i djathtë i Ervis Martinaj i konsideruar si mbreti i kumarit. Martinaj është zhdukur pa gjurmë prej 9 gushtit 2022.
