Vijon të reagojë nga qelia e burgut në Durrës, kreu i bashkisë së Tiranës Erion Veliaj. Teksa nuk kursen sulmet ndaj prokurorit të çështjes Ols Dado, nuk i del inati me akuzuesin Nesti Angoni, të cilin e quan anonim.
Ai thotë se gjendet në burgun e Durrësit pa e ditur se për çfarë e akuzojnë dhe se "Heroi i telenovelës time, Nesti Angoni, nuk ekziston, ndërsa Ols Dado ekziston, por në faqen e parë të dosjes sime ka shkruar “i dënuar”.
Nga ana tjetër, Erjon Kasapi, gjykatës i thënçin, ka konkluduar përpara se sa të shfaqesha në derën e thertores së tij, se unë “nuk po shfaq pendesë”.
Sot që gjendet pas dyerve të hekurit të burgut të Durrësit akuzon median se koordinohet me llumin politik, sipas tij, njeriun që bëri 45 shkolla dhe 109 çerdhe dhe tani, sikurse shkruan, "ço nëpër studio tv e në portale disa llapa-llapa të etur për gjak, me mision të veçantë, ku turren llapaqenërit veteranë".
"Pastaj merr vulën e thertores tek Erjon Kasapi dhe arrestoje gjënë e gjallë me biografi të keqe, thjesht për dyshime që edhe ti e di se s’janë prova" dhe sipas tij-"violinisti dështak përdor teknikat e ‘histerisë kolektive’ për gjyq në media pa gjyq në institucione për tre udhëtime me çarter, për udhëtime ekonomike që bën gjithë mileti".
Sipas Veliajt, "ky fuks pervers vazhdon dhe e lë aty si krim, sepse fjala “çarter”, normal, tingëllon shumë inkriminuese për gjyqin e studiove dhe portaleve" ndaj dhe për të duket se po i bëhet gjyq në media "nga një copë letër anonime dhe një prokuror i futur në Spak me mik! Pa gjyq!".
Dhe si për t'a mbyllur mesazhin, Veliaj ndonëse është në burg i dyshuar për katër vepra përshendet "me mall dhe kokën lart, se shejtanbudallait nuk do t’i hapim rrugë! Gjallë jo njëherë"!
