Sali Berisha ka qarë sot hallin e taksapaguesve amerikanë dhe fondeve të shpërdoruara të USAID në Shqipëri. Kryetari i opozitës është marrë sot gjatë me projektet e Linda Ramës dhe Delina Ficos, të cilat ndër vite kanë qenë të angazhuara në projekte të ndryshme në Shqipëri. Madje, sipas Berishës, këto janë dhe arsyet e kapjes së reformës në drejtësi, të cilën, për hir të së vërtetës, e kanë votuar 140 deputetët e parlamentit, përfshirë dhe vetë kryetarin e PD.
Më pak se 90 ditë para zgjedhjeve, kryetari i opozitës është marrë gjatë me atë që e konsideroi “shpërdorimin e fondeve të taksapaguesve amerikanë”, për të cilat, sipas tij, kanë përgjegjësi Edi Rama dhe Bledi Çuçi. Shqetësim për Sali Berishën është edhe shpërdorimi i fondeve të ambasadës së BE dhe SHBA nga fondacioni i Ajola Xoxes.
Sali Berisha i bën thirrje FBI-së të ndërmarrë një hetim në Shqipëri për të zbuluar se ku kanë shkuar paratë e taksapaguesve amerikanë.
