Komisioni i Etikës përjashtpo sot për herë të dytë Agron Shehajn me 30 ditë, ndërsa i dha një përjashtim 20 ditor për deputetin e tij Erald Kapri.
Kjo pasi në seancën e së enjtes, Edi Rama erdhi pasdite për të garantuar 84 votat e amnistisë.
Opozita, e cila bllokoi tre herë seancën gjatë paradites, vendosi që pasdite të mos shkonte në Parlament dhe të vetmit prezentë ishin Shehaj dhe Kapri të Partisë Mundësia.
Ata i shkuan afër kryeministrit dhe replikuan me të, madje i grisën dhe letrën ku shënohej emri i tij dhe posti kryeministror.
Për minuta të tëra Agron Shehaj hidhte akuza nga vendi ku po qëndronte në drejtim tyë kryeministrit çka detyroi kreun e Kuvendit të merrte masën e përjashtimit nga seanca.
Në një moment të dy deputetët e Mundësia iu afruan kreut të qeverisë në vendin ku po qëndronte pranë ministrave gjatë momentit të votimit, duke i kujtuar se duhet të jepte dorëheqjen pasi kjo ishte kërkesë edhe e protestuesve.
Nga ana e tij Rama i ka ironizuar përmes një statusi në faqen e tij në facebook.
“Kushedi si rrotullohet në varr i ndjeri Mit’hat Frashëri me këta karagjozë të dalë nga koteci i kokës. Natën natën, dhe shijojeni me kë ju do qejfi nëpër Tiranën e bukur e mos e çani kokën për ulëritësit e rrugëve, se aq u mban koteci të shkretëve”, shkruan Rama.
