Pas incidentit të ndodhur mbrëmjen e djeshme pranë Ambasadës së Izraelit në Tiranë, ka reaguar Partia Demokratike, e cila doli në mbrojtje të simbolit shtetëror izraelit dhe dënoi grisjen e flamurit.
Në një deklaratë zyrtare, Partia Demokratike e cilësoi ngjarjen si një akt kriminal, ekstremist dhe antisemit, duke kërkuar ndëshkimin ligjor të autorit.
“Partia Demokratike dënon me forcën më të madhe grisjen e flamurit të Izraelit, të ngritur në ambasadën e këtij vendi, si një akt kriminal ekstremist dhe antisemit, që bie ndesh me ndjenjat dhe lidhjet tradicionale që bashkojnë dy kombet dhe vendet tona dhe kërkon ndëshkimin e merituar ligjor të autorit”, thuhet në reagim.
Sipas PD-së, veprime të tilla nuk përfaqësojnë qytetarët shqiptarë dhe dëmtojnë marrëdhëniet tradicionale të miqësisë mes Shqipërisë dhe Izraelit.
Reagimi i demokratëve vjen pasi gjatë protestës së mbrëmshme një grua u ngjit pranë godinës së Muzeut “Shtëpia me Gjethe” dhe tërhoqi flamurin izraelit, i vendosur pranë Ambasadës së Izraelit në Tiranë.
