Presidenti i Serbisë, Aleksandar Vuçiç, deklaroi të dielën se autoritetet serbe po zhvillojnë një hetim për shpërthimin e ndodhur në një kanal të Ibër-Lepencit në veri të Kosovës. Ai ka hedhur poshtë përsëri akuzat e autoriteteve kosovare, sipas të cilave Beogradi mund të ketë lidhje me sulmin ndaj infrastrukturës jetike të Kosovës.
Shpërthimi, që ndodhi mbrëmjen e së premtes, shkaktoi dëme të konsiderueshme në kanalin e ujit të Ibër-Lepencit, në fshatin Varragë të komunës së Zubin Potokut, duke ngritur shqetësime për mundësinë e mungesës së ujit dhe energjisë elektrike në shumë pjesë të vendit.
Vuçiç theksoi se autoritetet serbe nuk kishin asnjë lidhje me këtë incident dhe se, si një shtet i përgjegjshëm, ata nuk do të angazhoheshin në akuza të pamenduara. Ai kundërshtoi akuzat e kryeministrit të Kosovës, Albin Kurti, i cili e kishte akuzuar Serbinë për “dirigjimin” e këtij sulmi, duke e cilësuar si një akt “terrorist dhe kriminal”.
Presidenti serb shtoi se hetimet janë duke u zhvilluar për të zbardhur të vërtetën dhe se, ndërkohë, autoritetet serbe kanë disa dyshime, por vetëm hetimi do të mund të tregonte kush e ka urdhëruar sulmin. Ai gjithashtu sugjeroi se mund të ketë pasur një tentativë për sulm hibrid ndaj Serbisë.
