Shtetet e Bashkuara të Amerikës janë përballur me një mot ekstrem gjatë ditëve të fundit, teksa stuhitë e fuqishme dhe tornadot kanë goditur disa zona të pjesës qendrore dhe lindore të vendit, duke shkaktuar shkatërrime masive dhe humbje jetësh. Deri më tani janë konfirmuar të paktën 16 viktima, mes tyre dy fëmijë – një 9-vjeçar në Kentucky dhe një 5-vjeçar në Arkansas. Të dy humbën jetën si pasojë e përmbytjeve, ndërsa po përpiqeshin të shkonin në shkollë apo në stacionin e autobusit.
Stuhitë dhe reshjet intensive kanë prekur një zonë të gjerë nga Arkansas deri në Ohio, duke bllokuar rrugët dhe lënë qindra mijëra qytetarë pa energji elektrike. Tennessee është cilësuar si shteti më i goditur gjatë fundjavës, ndërsa edhe Luiziana, Alabama dhe Georgia kanë raportuar dëme të mëdha nga moti i keq.
Shërbimi Meteorologjik Kombëtar i SHBA-së ka paralajmëruar se kushtet e pafavorshme atmosferike do të vijojnë edhe në ditët në vijim. Mbi 75 milionë amerikanë rrezikojnë të preken nga përmbytjet, stuhitë dhe tornadot, ndërsa autoritetet u bëjnë thirrje qytetarëve të marrin masa paraprake dhe të ndjekin udhëzimet e emergjencave lokale.
Shkencëtarët e lidhin këtë situatë ekstreme me pasojat e ngrohjes globale. Sipas tyre, ndryshimet klimatike po ndikojnë në intensitetin dhe shpeshtësinë e fenomeneve të rënda atmosferike. Vitin e kaluar, SHBA shënoi një rekord të ri të temperaturave të larta, ndërsa u përball edhe me një numër të pazakontë uraganesh dhe tornadosh shkatërruese. Rritja e këtyre fenomeneve është kthyer në një alarm serioz për klimën dhe jetën e përditshme të qytetarëve amerikanë.
