Në qytetin e Valjevës në Serbi, një ngjarje e pazakontë ka tërhequr vëmendje. Sipas raportimeve nga mediat serbe, në një billboard është shfaqur një imazh ku paraqitet një shqiponjë me dy krerë, e cila mban një plis në kokë dhe “kap për fyti” shqiponjë tjetër, pas së cilës duket flamuri i Serbisë. Ky imazh është interpretuar si një provokim, duke shkaktuar reagime të forta në vend dhe debat mbi motivet dhe mesazhin pas kësaj shfaqjeje.
“Në qendër të qytetit është shfaqur ky billboard. Besohet se është hakuar dhe konsiderohet si një provokim”, thuhej në postim.
Ndërkohë, një person që pretendon të jetë pronar i billboardit, ka reaguar në komentet e postimit.
“Jam pronari i billboardit që është hakuar mbrëmë. E fikëm menjëherë sapo e kuptova, dhe rasti do të raportohet tek autoritetet përkatëse”, ka shkruar ai.
