Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve deklarojnë se, pas mosveprimit të Kuvendit brenda afatit të caktuar nga Gjykata Kushtetuese, vendimi për mënyrën e re të përllogaritjes së pagave të magjistratëve ka hyrë tashmë drejtpërdrejt në fuqi.
Në një deklaratë të përbashkët, shoqatat kujtojnë se Gjykata Kushtetuese, me vendimin nr. 15 të 17 shkurtit 2026, shfuqizoi ndryshimet ligjore të vitit 2023, duke vlerësuar se ato cenonin statusin financiar të magjistratëve përmes një uljeje të fshehur të pagës. Gjykata i kishte lënë Kuvendit afat deri më 31 korrik 2026 për të miratuar ndryshimet e nevojshme ligjore.
Sipas shoqatave, meqenëse Kuvendi nuk ndërmori veprime brenda këtij afati, nga 1 gushti 2026 pagat e magjistratëve duhet të llogariten sipas formulës që i referohet pagës së funksionarit të administratës së lartë publike, në përputhje me vendimin nr. 35/2022 të Gjykatës Kushtetuese. Po ashtu, kjo formulë zbatohet me efekt prapaveprues për periudhën 1 prill 2023 – 31 korrik 2026.
Shoqatat u bëjnë thirrje institucioneve përgjegjëse të zbatojnë vendimin e Gjykatës Kushtetuese në përputhje me Kushtetutën, duke paralajmëruar se do të monitorojnë nga afër procesin e zbatimit të tij.
