Në Tivat po mbahet sot Samiti BE–Ballkani Perëndimor, ku kryeministri Edi Rama zhvilloi një komunikim të shkurtër me gazetarët, duke iu përgjigjur interesimit për çështjen e Zvërnecit.
Kreu i qeverisë theksoi se aktualisht nuk ekziston asnjë projekt i miratuar dhe për këtë arsye, sipas tij, nuk ka arsye për debat apo shqetësim publik.
“Nuk ka asgjë për të diskutuar, sepse nuk ka asnjë projekt të miratuar. Së pari duhet të kemi një projekt, ta diskutojmë dhe ta miratojmë. Nuk mund të diskutojmë për një projekt që nuk ekziston. Faktet kanë gjithnjë rëndësi”, deklaroi Rama.
Më tej, kryeministri u shpreh se nuk ka vend për shqetësime në mungesë të një projekti konkret, ndërsa shtoi se synimi i arkitektëve është krijimi i diçkaje unike.
“Nuk ka arsye për t’u shqetësuar për sa kohë që nuk ka projekt. Arkitektët duan të bëjnë diçka unike dhe një dhuratë të mrekullueshme për Shqipërinë”, tha Rama.
