Sali Berisha ishte sot në një takim entuziast me emigrantët shqiptarë në Romë. Duke kërkuar votën e tyre dhe duke e cilësuar Ramën si kreun e organizatës kriminale, kryetari i PD nuk la pa përmendur edhe dy “mrekulli hyjnore” që sipas tij kanë ndodhur së fundmi.
E para, sipas tij, është fitorja e Trump. Madje, mrekullia vijon me faktin se Blinken-it ia ka ndaluar Trump dje të futet në çdo ndërtesë federative. “I pabesë! Organizoi kurthe e letra për të mashtruar kombin e tij,” tha Berisha, i cili shtoi se “Mrekullia e dytë ishte vota e diasporës.”
Ish-kryeministrit Sali Berisha mesa duket nuk i del inati me ish-sekretarin e Shtetit në SHBA, Antony Blinken, i cili e shpalli kreun e PD non grata.
Një falënderim Berisha kishte edhe për autoritetet italiane, ndërsa u ndal tek Silvio Berlusconi, për të cilin tha se mbetet i pavdekshëm. Berisha kujtoi bisedat me ish-kryeministrin italian, që sipas tij sa herë e takonte, i thoshte: “Me shqiptarët nuk kemi asnjë problem, janë të shkëlqyer.”
