Nëpërmjet një reagimi të Shërbimit Meteorologjik Ushtarak dhe IGJEO, Ministria e Mbrojtjes ka kërkuar nga të gjitha strukturat vendore dhe qendrore të jenë në gatishmëri për të reaguar në kohë ndaj çdo situate emergjente për shkak të kushteve meteorologjike të pritura.
Sipas parashikimeve të IGJEO dhe SHMU, për pjesën e dytë të ditës së sotme priten reshje të dobëta në të gjithë qarqet e vendit. Megjithatë, më 23 dhjetor, reshje intensive deri shumë intensive do të përfshijnë qarqet Vlorë, Gjirokastër, Shkodër, Kukës dhe Dibër, ndërsa në zonat e tjera reshjet do të jenë mesatare deri intensive, të shoqëruara me shtrëngata.
Në lartësitë mbi 400 metra, në veri, lindje dhe juglindje të vendit, reshjet pritet të jenë në formë dëbore, duke shkaktuar ngrica dhe vështirësi në transport. Ministria thekson rëndësinë e bashkëpunimit dhe veprimit të shpejtë për të minimizuar pasojat dhe për të siguruar mbrojtjen e qytetarëve.
