Çdo fillim shtatori, bashkë me nisjen e vitit politik, rikthehet edhe rituali i konsumuar i "luftës" kundër nepotizmit në radhët e socialistëve. Pasi ka drejtuar vendin për më shumë se një dekadë e gjysmë, kryeministri Edi Rama ka zgjedhur këtë herë të rrisë dozën e presionit retorik, duke propozuar masa ekstreme si përgjimi dhe ndjekja penale për deputetët e vet që ndërhyjnë në punësimet në administratë.
Në mbledhjen me kabinetin dhe grupin parlamentar, Rama ka lëshuar kërcënime të drejtpërdrejta, duke propozuar që mesazhet e ligjvënësve për favore punësimi të trajtohen ligjërisht si vepra penale dhe të hetohen përmes përgjimeve.
“Do ju kërkoj ta votoni, që nëse shkruani SMS për të futur në punë njerëz, të quhet vepër penale. Do ju shoh në sy e do ju kërkoj ta votoni, si vepër penale”, deklaroi Rama me tone ultimatumi para deputetëve që e dëgjonin në heshtje.
Me të njëjtin optimizëm si në çdo shtator të kaluar, kryeministri pretendoi se këtë herë përzgjedhja në shtet do t'i nënshtrohet vetëm aftësisë dhe jo njohjeve personale:
“Shkalla e meritës do të bëjë që të mos parakalojnë fisi e miqtë tuaj përmes WhatsApp, por të lejojë ata që e meritojnë të punësohen në administratën publike”, u shpreh ai.
Megjithatë, ironia e këtij "revolucioni" të radhës qëndron te kontrasti me realitetin. Ndërsa shkalla e kërcënimeve verbale rritet nga viti në vit, duke kaluar nga thirrjet për ndërgjegjësim te propozimet për përgjime e burgosje të deputetëve të vetë mazhorancës, sistemi i punësimeve mbetet po ai. Pas 14 vitesh në pushtet, premtimi për eliminimin e "sekserëve" përmes kërcënimeve ligjore duket më shumë si një shfaqje e radhës propagandistike sesa si një vullnet i vërtetë për ndryshim.
