Kryeministri Edi Rama ka mbledhur kabinetin qeveritar dhe grupin parlamentar socialist në një takim të gjatë, i cili shoqërohet nga pritja dhe ankthi i ndryshimeve të mundshme në qeveri.
Gjatë fjalës së tij, ai prezantoi atë që e cilësoi si "zgjidhjen" për të rikthyer besimin e qytetarëve: platformën e re "PasqyrAlbania". Sipas tij, kjo hapësirë digjitale e qeverisë do të shërbejë për t’iu kundërvënë lajmeve të mediave dhe portaleve lidhur me dështimet e pretenduara të pushtetit.
Rama deklaroi se qytetarët nuk duhet të fajësohen kur manipulohen nga media, por duhet të kenë mundësi ta mësojnë të vërtetën drejtpërdrejt nga burimet zyrtare.
“Nga një meandër në xhungël, qytetari do të kalojë në labirintin e pasqyrave digjitale të informacionit. Nga viktimë e dezinformacionit, kjo platformë e kthen atë në mbikëqyrës”, u shpreh kryeministri.
Ndërkohë, në sallë ka mbizotëruar heshtja, me pjesëmarrësit që presin me ethe përfundimin e fjalimit, ku zakonisht bëhen publike edhe lëvizjet e reja në ekzekutiv.
