Policia ka reaguar në lidhje me rastin e helmimit të disa kursantëve të Kolegjit Profesional të Formimit Policor në Akademinë e Sigurisë, të cilët janë paraqitur për ndihmë mjekësore në Repartin Infektiv të QSUT-së.
Sipas njoftimit zyrtar, rreth 60 kursantë kanë shfaqur simptoma të rënda si temperaturë dhe diarre. Prej tyre, 31 persona morën trajtim gjatë natës dhe më pas u rikthyen në akademi në gjendje të stabilizuar, ndërsa gjatë mëngjesit janë raportuar edhe 29 raste të tjera me të njëjtat shqetësime.
Për ngjarjen është ngritur një grup i posaçëm hetimor nën drejtimin e Prokurorisë dhe në bashkëpunim me Agjencinë e Mbikëqyrjes Policore (AMP). Ndërkohë, Autoriteti Kombëtar i Ushqimit (AKU) ka bllokuar ushqimet e konsumuara dhe ka marrë mostrat për analiza laboratorike, me qëllim përcaktimin e shkakut të helmimit.
Njoftimi i plotë i policisë:
Në orët e mbrëmjes së djeshme dhe në orët e para të mëngjesit të sotëm janë dërguar për ndihmë mjekësore në Repartin Infektiv të QSUT-së 31 kursantë të Kolegjit Profesional të Formimit Policor në Akademinë e Sigurisë, me simptoma si temperaturë dhe diarre, të cilët kanë marrë ndihmën e nevojshme mjekësore dhe janë kthyer në Akademinë e Sigurisë në gjendje të mirë shëndetësore.
Ndërkohë, mëngjesin e sotëm janë paraqitur në qendrën shëndetësore të Akademisë së Sigurisë edhe 29 kursantë të tjerë të Kolegjit Profesional të Formimit Policor, të cilët janë dërguar për ndihmë mjekësore në Repartin Infektiv të QSUT-së.
Menjëherë është ngritur një grup i posaçëm hetimor, i cili, në bashkëpunim me Agjencinë e Mbikëqyrjes Policore (AMP) dhe nën drejtimin e Prokurorisë, po kryen veprimet hetimore për dokumentimin e plotë të rrethanave të rastit dhe përcaktimin e përgjegjësive përkatëse.
Ndërkohë, Autoriteti Kombëtar i Ushqimit (AKU) ka marrë mostra të ushqimeve të konsumuara, të cilat do t’i nënshtrohen analizave laboratorike për të përcaktuar shkakun e kësaj situate.
Gjithashtu, të gjithë kursantëve u janë bërë analizat dhe pritet dalja e përgjigjeve për të përcaktuar shkakun. Grupi hetimor vijon punën për sqarimin e plotë të rrethanave të rastit.
