Prokuroria e Tiranës merr të pandehura motrat Antonela e Mariela Berisha për akuzën e plagosjes së rëndë me dashje dhe pritet të dorëzojë për gjykim dosjen penale ndaj tyre.
Të dyja akuzohen për plagosjen e blogeres Klea Prenga në një nga restorantet luksoze në zonën e Kodrës së Diellit në Tiranë, mbrëmjen e 6 gushtit 2024.
Sic rezultoi dhe nga pamjet filmike, të dyja motrat i afrohen blogeres dhe e godasin me shishe qelqi duke i shkaktuar dëmtime të rënda në fytyrë.
Sipas aktit të ekspertimit rezulton se dëmtimet konsiderohen shëmtim i përhershëm që hyjnë në kategorinë e plagosjes së rëndë me dashje e për këtë vepër penale motrat Berisha do të japin llogari para drejtësisë.
Motrat, Antonela dhe Mariela Berisha u larguan nga Shqipëria pas ngjarjes dhe qëndruan disa kohë jashtë vendit. Ata u vetëdorëzuan në polici dhe aktualisht Antonela mbahet nën masën e detyrimit për paraqitje, ndërsa Mariela në masën e arrestit në shtëpi.
