Një incident i rëndë u regjistrua këtë të hënë në ambientet e Gjykatës së Posacme Kundër Korrupsionit dhe Krimit të Organizuar. Gjatë seancës paraprake kundër të pandehurve për rrëmbimin dhe vrasjen e 23-vjeçarit Renis Dobra, vëllezërit Fatjon, Aleksandër dhe Kristi Bushgjokaj dhunuan brenda kafazit të qelqtë, Petrit Çakrajn.
Tre vëllezërit e akuzojnë Çakrajn se i ka spinuar dhe ka shpifur ndaj tyre para autoriteteve.
Gjatë përleshjes fizike janë dëmtuar edhe tre efektivë të policisë së burgjeve. Gjykata e ndërpreu menjëherë seancën dhe kërkoi ndihmën e policisë. Por deri më tani drejtuesit e GJKKO nuk kanë dhënë shpjegime se përse nuk janë marrë masa për sigurinë fizike për të pandehurit dhe përse Petrit Çakraj është vendosur në të njëjtin kafaz prej xhami, kur ai ka dëshmuar kundër 3 vëllezërve. Renis Dobra u rrëmbye dhe vra për shkak të përplasjeve të grupeve kriminale në trafikun e drogës.
