Grupi Parlamentar i Partisë Demokratike ka depozituar një kallëzim penal në SPAK kundër 73 deputetëve të Partisë Socialiste, përfshirë Kryeministrin Edi Rama, Kryeparlamentaren Elisa Spiropali dhe Kreun e Grupit të PS, Niko Peleshi.
Deputetët e mazhorancës akuzohen për pengimin e ekzekutimit të dy vendimeve të Gjykatës Kushtetuese, duke konsumuar veprat penale të parashikuara në nenet 320 dhe 320/a të Kodit Penal.
Sipas PD, vendimi për të mos dërguar mandatin e ish-ministres Olta Xhaçka në Gjykatën Kushtetuese përbën një pengesë ndaj drejtësisë dhe përpjekje për të mbrojtur interesat e saj personale. Kjo akuzë lidhet me vendimet nr. 1/2023 dhe nr. 55/2024 të Gjykatës Kushtetuese, të cilat, sipas opozitës, janë penguar qëllimisht nga shumica parlamentare.
Kodi Penal i Republikës së Shqipërisë parashikon se mosekzekutimi i vendimeve të gjykatës është i dënueshëm me gjobë ose burgim deri në tre vjet. PD ka kërkuar regjistrimin e procedimit penal dhe nisjen e hetimeve për të vërtetuar veprimet e deputetëve të PS në këtë çështje.
