Ish-kryebashkiaku i Mallakastrës, Agron Kapllanaj, ka bërë një denoncim publik lidhur me një përpjekje për shantazh ndaj tij. Në një intervistë për News24, Kapllanaj ka deklaruar se një femër i ka kërkuar një shumë prej 4000 eurosh, duke i dërguar atij foto të modifikuara dhe duke i shpërndarë ato tek miqtë e tij.
Kapllanaj ka theksuar se ndihet i indinjuar nga këto veprime, të cilat i cilëson si të ulëta dhe të papërgjegjshme. Sipas tij, qëllimi kryesor i kësaj përpjekjeje ishte prishja e imazhit të tij publik. Ai ka theksuar se i ka refuzuar kërkesat për para dhe ka tentuar të zgjidhë situatën me qetësi.
“I kam thënë që nuk është kjo rruga për të kërkuar para. Nëse do të më kishte kërkuar ndihmë të sinqertë për motrën e sëmurë, siç pretendonte, do e kisha ndihmuar pa asnjë hezitim,” ka shtuar Kapllanaj.
Në një postim në rrjetet sociale, ish-kryebashkiaku ka treguar se ndodhet jashtë vendit për momentin, por sapo të kthehet në Shqipëri, do t’i drejtohet organeve ligjzbatuese për të bërë kallëzim zyrtar. Kapllanaj ka ruajtur të gjitha provat e bisedave dhe shantazheve që ka marrë dhe ka theksuar se nuk do të lejojë që imazhi i tij të dëmtohet nga persona të papërgjegjshëm.
