Një ngjarje e rëndë është regjistruar rreth orës 02:30 të mëngjesit të sotëm në Mirditë, ku një 30-vjeçar ka raportuar në Polici se është qëlluar me armë zjarri drejt banesës së tij.
Sipas njoftimit zyrtar, shtetasi E. Ç., 30 vjeç, njoftoi sallën operative se persona ende të paidentifikuar në ato momente kishin hapur zjarr ndaj shtëpisë së tij. Menjëherë në vendngjarje kanë mbërritur forcat e Policisë dhe grupi hetimor, të cilët konstatuan një shenjë goditjeje me armë zjarri në murin e banesës.
Pas hetimeve të shpejta, Policia ka identifikuar autorin e dyshuar si Luan Vuka, 51 vjeç, banues në fshatin Nerfushaz. Ai akuzohet se ka qëlluar në drejtim të banesës së E. Ç., i cili është vëllai i ish-bashkëshortes së tij. Dyshohet se ngjarja ka ndodhur si pasojë e një konflikti të ashpër familjar.
Mësohet se Luan Vuka ishte shpallur në kërkim edhe një ditë më parë, pasi kishte ushtruar dhunë fizike ndaj të njëjtit person.
Policia e Mirditës vijon punën intensive për kapjen e tij, ndërsa materialet procedurale i janë referuar Prokurorisë së Lezhës për veprime të mëtejshme ligjore.
