Prokuroria e Milanos ka mbyllur hetimet ndaj influencueses së njohur Chiara Ferragni dhe disa të tjerëve të përfshirë në skandalin e lidhur me kompaninë “Balocco” dhe vezët e Pashkëve të markës “Dolci Preziosi”. Hetimet janë mbyllur edhe për Fabio Damato-n, ish-bashkëpunëtorin e Ferragni-t, Alessandra Balocco-n, pronaren e kompanisë “Pandoro,” dhe Franco Cannillo, përfaqësuesin e “Dolci Preziosi”.
Avokatët e Ferragni-t, Giuseppe Iannaccone dhe Marcello Bana, deklaruan se ajo beson në pafajësinë e saj dhe janë të bindur se çështja do të zgjidhet shpejt. “Kjo çështje nuk ka rëndësi penale dhe aspektet e diskutueshme janë trajtuar dhe zgjidhur brenda kompanisë. Diskutimet me prokurorët do të fillojnë së shpejti dhe jemi optimistë për një rezultat pozitiv,” u shprehën avokatët.
Skandali i fushatës bamirëse
Rasti u bë publik në dhjetor kur mediat italiane zbuluan se fushata bamirëse e nisur nga Ferragni dhe kompania “Balocco” për spitalin në Torino përfshinte mashtrim me çmimet dhe donacionet. Fillimisht, u deklarua se ëmbëlsirat do të shiteshin me një çmim prej 9 eurosh, ku një pjesë e fitimeve do të dhurohej për bamirësi. Megjithatë, autoritetet zbuluan se vetëm një shumë prej 50 mijë eurosh ishte transferuar në llogarinë e spitalit, dhe ky transaksion ishte bërë një muaj përpara nisjes së fushatës.
Hetimet tashmë janë mbyllur, dhe mbetet për t’u parë se çfarë rezultatesh do të sjellë ky proces për Ferragni dhe bashkëpunëtorët e saj.
