Fshati Vidhishtë i Roskovecit është zgjuar këtë mëngjes i zhytur në heshtje dhe dhimbje, pas krimit të rëndë që i mori jetën dy bashkëshortëve dhe tronditi mbarë opinionin publik.
Banorët kanë lënë pas rutinën e përditshme dhe janë drejtuar drejt banesës së familjes Plaka, ku janë hapur dyert e mortit. Mes lotëve dhe tronditjes, të afërm, miq dhe fqinj kujtojnë dy të ndjerët si njerëz punëtorë, të urtë dhe të respektuar nga i gjithë komuniteti.
Sot, në orën 11:00, qindra familjarë, miq dhe banorë do t’u japin lamtumirën e fundit dy bashkëshortëve në varrezat e fshatit, në një ceremoni të mbushur me dhimbje.
Ndërkohë, ceremonia mortore për autorin e ngjarjes do të zhvillohet paraditen e së dielës. Vendimi është marrë për të shmangur çdo tension mes familjeve, pasi ato jetojnë në të njëjtën zonë dhe ceremonitë do të zhvillohen në të njëjtat varreza.
Edhe pse kanë kaluar vetëm pak orë nga tragjedia, dhimbja mbetet e madhe në Vidhishtë. Banorët thonë se kjo ngjarje ka lënë plagë të thella dhe se dita e sotme do të mbetet gjatë në kujtesën e tyre si një nga momentet më të rënda që ka përjetuar fshati.
