Është rënduar bilanci i ngjarjes së rëndë të ndodhur mëngjesin e së premtes në fshatin Vidhishtë të Roskovecit. Belere Plaka, 55 vjeçe, e cila mbeti e plagosur gjatë sulmit me armë zjarri, ka ndërruar jetë në spital si pasojë e plagëve të marra.
Sipas të dhënave paraprake, 35-vjeçari Refit alias Nertil Buzi dyshohet se vrau me armë gjahu Arben Plakën babanë e ish-partneres së tij dhe plagosi rëndë nënën e saj, Belere Plaka. Më pas ai mbajti peng për disa orë ish-partneren, ndërsa forca të shumta policie rrethuan zonën dhe zhvilluan negociata për ta bindur të dorëzohej.
Pas disa orësh përballje me policinë, autori i dyshuar i ngjarjes i dha fund jetës, duke u vetëvrarë me armën e gjahut që mbante me vete brenda automjetit ku ishte i rrethuar nga efektivët.
Policia dhe grupi hetimor vijojnë hetimet për të zbardhur plotësisht rrethanat dhe motivet që çuan në këtë ngjarje të rëndë.
Roskovec, Fier/Informacion shtesë
Në vijim të informacioneve paraprake të dhëna për ngjarjen e rëndë kriminale të ndodhur në fshatin Vidhisht, Roskovec, ju informojmë se shtetasja B. P., 51 vjeçe, e cila ishte plagosur me armë gjahu nga shtetasi R. B., 35 vjeç, ka humbur jetën në spital, si pasojë e dëmtimeve të marra.
Grupi hetimor, në drejtimin e Prokurorisë vijon veprimet procedurale dhe hetimore për dokumentimin e plotë ligjor të ngjarjes, si dhe për sqarimin e të gjitha rrethanave dhe zbardhjen e motivit.
