Barcelona ka njoftuar zyrtarisht rinovimin e kontratës me një nga talentet më të mëdha që ka nxjerrë futbolli botëror në dekadat e fundit: Lamine Jamal. Adoleshenti i mrekullueshëm, që ende nuk ka mbushur 18 vjeç, ka firmosur me klubin katalanas një kontratë të re që do ta mbajë në “Camp Nou” deri në vitin 2031, me një pagë marramendëse dhe një klauzolë transferimi që sfidon çdo logjikë tregu – plot 1 miliard euro.
Fenomeni i ri, prodhim i akademisë legjendare “La Masia”, është cilësuar tashmë si pasardhësi i denjë i yjeve si Mesi, Ksavi dhe Iniesta. Performanca e tij e jashtëzakonshme në sezonin aktual e ka kthyer në simbolin e ri të Barcelonës dhe një emër të rëndësishëm në skenën ndërkombëtare të futbollit. Ai ka luajtur mbi 100 ndeshje me fanellën “blaugrana”, ndërsa vetëm këtë edicion ka zhvilluar 55 ndeshje, duke realizuar 18 gola dhe dhënë 25 asistime. Kontributi i tij ka qenë vendimtar për fitoret e mëdha të klubit: La Liga, Kupa e Mbretit dhe Superkupa e Spanjës.
Oferta të majme nuk kanë munguar. Mediat spanjolle raportojnë se Paris Saint-Germain ka tentuar të sigurojë shërbimet e Lamine Jamal duke ofruar 200 milionë euro, por drejtuesit katalanas nuk e morën as në konsideratë këtë shifër. Për ta, Jamal nuk ka çmim – ai është një nga ata futbollistë që lindin një herë në 30 apo 50 vjet.
Kontrata e re e parashikon një rrogë bazë prej 7 milionë euro në sezon (pa llogaritur taksat), por për shkak të rëndësisë së jashtëzakonshme sportive dhe ekonomike që ylli i ri ka për klubin, janë përfshirë edhe bonuse të ndryshme që mund ta çojnë pagën deri në 15 apo edhe 20 milionë euro në vit.
Rinovimi i kontratës vjen si një hap strategjik për Barcelonën, e cila synon jo vetëm të ruajë një nga asetet më të vlefshme të skuadrës, por edhe të ndërtojë rreth tij të ardhmen e klubit. Ai shihet si kandidati ideal për të fituar “Topin e Artë” në vitet në vijim, ndërsa me kombëtaren spanjolle ka spikatur po ashtu në arenën ndërkombëtare. Në Kampionatin Europian të vitit të kaluar, Jamal u shpall lojtari i ri më i mirë i turneut, duke treguar se fama e tij nuk është thjesht një shpërthim sezonal, por fillimi i një karriere të ndritur.
Me këtë marrëveshje të re, Barcelona i jep një sinjal të fortë gjithë Europës: Lamine Jamal nuk është në shitje. Ai është e ardhmja e klubit, dhe një figurë që do të vazhdojë të shkëlqejë në “Camp Nou” për shumë vite.
