Ku ka zë s’është pa gjë- kështu thotë populli për rastet kur zhurma i paraprin një ngjarjeje që dikush po mundohet ta bëjë të duket sikur janë vetëm zëra dhe asgjë më shumë. Ky duket të jetë dhe fati i kërkesave qe SPAK ka dërguar në Gjykatën e Posaçme për inceneratorin e Tiranës. Zhurma që i parapriu ngjarjes ishte e madhe dhe ajo qé po ndodh brenda dyerve të institucioneve të drejtësisë është ende e panjohur plotësisht.
Nuk është hera e parë që vorbulla e lajmeve të pakonfirmuara mbyt faktet dhe jo pa qëllim, kjo gjë ndikon dhe tek njerëzit që janë pjesë e këtij procesi. Prokurorë dhe gjykatës jo rrallëherë janë intimiduar dhe penguar në punën e tyre nga presioni i lajmeve apo sekreteve hetimore të publikuara paraprakisht. Fakt mbetet që megjithë të pathënat zyrtare, hetimi për inceneratorin e Tiranës ka hyrë në fazën finale të tij ku pritet të ketë dhe surpriza të paralajmëruara. Sikundër po kaq e vërtetë është që rrethi i personave që do merren si të pandehur apo do të konsiderohen zyrtarisht “nën hetim” do të zgjerohet pa lënë jashtë dhe ata që janë konsideruar si të paprekshëm.
Në vorbullën e një thashethemnaje të përhapur jo rastësisht, qartas elementë të SPAK, Gjykatës së Posaçme, politikës dhe medias gatuajnë lajme që i paraprijnë ndodhive, për të zbehur apo rritur sipas interesit intesitetin e goditjes që pritet të ndodhë.
Meqë kthimi i kombëtares në atdhe pa fitore e shumëpritur e ktheu sërish vëmendjen e publikut tek e përditshmja e zymtë, një dorë e kujdesshme po përpiqet ta mbajë zhurmën tek ajo që pritet të ndodhë në SPAK. Me bindjen ndoshta se mund të intimidojë prokurorë dhe gjykatës e ti thotë publikut se “gjithçka ka qenë e orkestruar politikisht”. Ose me shpresën se zhurma e madhe do të prodhojë një peshk të vogël.
Ajo që dihet me siguri është se faza e ardhshme e ndeshjeve të Europianit ndoshta nuk do të ofrojë emocionet e ndeshjeve te kombëtares. Por mesa duket dikush tjetër do kujdeset që gjërat të ndodhin në kohën dhe vendin e duhur për të mos na lënë pa emocione. Por të qartë ama që këtë nuk do e caktojnë ata që i tremben drejtësisë.
