Kryetari i Partisë Demokratike, Sali Berisha, ditën e sotme njoftoi një konferencë për mediat nga shtëpia e tij ku kishte paralajmëruar një denonconcim.
Por denoncimi i ish-kryeministrit nuk ishin as më shumë e as më pak akuzat e bëra më herët ndaj ministrit Taulant Balla për çështjen “Toyota Yaris”. Qëllimi i konferencës mesa duket kishte një tjetër nëntekst shumë të rëndësishëm dhe që përforcon dyshimet e ngritura më herët nga VNA që opozita të ulet në Komisionin “Xhafaj”.
Berisha ndër të tjera tha se krijimi i komisionit të së vërtetës është rruga e vetme për të bërë radiografi, në mënyrë që Dumanër, Gjoka, gjykatës, prokurorë kriminelë të mos mund t’i fshehin qytetarëve shqiptarë krime të shëmtuara.
"Të dashur qytetarë dhe qytetare! Këto janë disa të dhëna paraprake, të cilat i ekspozova, jo për të shuar kuriozitetin, dhe as për t’i përdorur për qëllime politike, por thjesht për t’ju informuar se si ky shtet është i kapur këmbë e kokë nga krimi dhe peng i tij. Krijimi i komisionit të së vërtetës është rruga e vetme për të bërë radiografi, në mënyrë që Dumanër, Gjoka, gjykatës, prokurorë kriminelë të mos mund t’i fshehin qytetarëve shqiptarë krime të shëmtuara të deputetëve të tyre, ministrave të tyre, kryeministrit të tyre. Vetëm krijimi i një komisioni të së vërtetës që do të jetë pjesë integrale e programit të PD do mund të ndajë në mënyrë përfundimtare Shqipërinë nga bota e krimit shtetëror-qeveritar të sotëm. Faleminderit" - tha Berisha.
Kujtojmë se në 30 maj të këtij viti Kuvendi ka miratuar krijimin e Komisionit të Posaçëm për Reformën në Sistemin e Drejtësisë. Ky komision është konceptuar me 11 anëtarë, 6 nga PS dhe 5 nga opozita. Por opozita e cila deri në mbyllje të sezonit parlamentar u akuzua se bashkëpunoi me Ramën për disa çështje si amnistia penale apo reforma zgjedhore, në këtë komision nuk mori pjesë as në votim.
Por edhe pse nuk e votoi, dëshira duket se është e madhe për t’iu bashkuar Xhafajt. SPAK dhe GJKKO janë një shqetësim serioz si për mazhorancën dhe për opozitën pasi kanë arrestuar zyrtarë dhe ish zyrtarë të lartë, si dhe vijojnë të kenë nën hetim disa të tjerë për korrupsion.
