Këshilli i Lartë i Prokurorisë ka hapur zyrtarisht garën për zgjedhjen e Prokurorit të Përgjithshëm, në një proces që vjen përpara përfundimit të mandatit të kreut aktual të akuzës, Olsian Çela.
Sipas vendimit të KLP-së, kandidatët e interesuar kanë një afat prej 30 ditësh për të dorëzuar dokumentacionin dhe aplikimet për postin më të lartë të Prokurorisë së Përgjithshme. Procesi do të zhvillohet përmes një thirrjeje publike.
Mandati i Prokurorit të Përgjithshëm, Olsian Çela, përfundon në dhjetor të vitit 2026, ndërsa KLP ka nisur tashmë procedurat për përzgjedhjen e pasuesit të tij.
Në njoftimin zyrtar bëhet e ditur gjithashtu se në rendin e ditës të mbledhjes plenare të datës 18.06.2026 u përfshi edhe miratimi i procesverbalit, si dhe shqyrtimi i projektvendimit “Për shpalljen e fillimit të procedurës për përzgjedhjen e kandidatëve për Prokuror të Përgjithshëm, përmes thirrjes publike për aplikim”.
