Dy shtetas shqiptarë janë dënuar me nga 18 muaj burg nga autoritetet belge, pasi u shpallën fajtorë për vjedhje në një banesë.
Sipas mediave belge, dy të rinjtë kishin hyrë në shtëpinë e një personi të ndjerë, ndërsa veprimet e tyre u vunë re nga një banor i zonës, i cili njoftoi menjëherë policinë. Në momentin e arrestimit, ata mbanin veshur doreza dhe kishin me vete një elektrik dore.
Prokuroria bëri të ditur se në posedim të tyre u gjetën bizhuteri që i përkisnin pronarit të ndjerë të banesës. Gjithashtu, në dritare u konstatuan gjurmë të përdorimit të kaçavidës, ndërsa një sensor lëvizjeje ishte hequr.
Gjatë procesit gjyqësor, avokatja mbrojtëse, Julie Croëet, deklaroi se klienti i saj kishte shkuar në Belgjikë për të punuar në ndërtim, por nuk ishte paguar dhe ishte përballur me vështirësi financiare.
“Klienti im erdhi nga Shqipëria në Belgjikë për të punuar. Ai punoi në ndërtim për një periudhë, por nuk u pagua. Ishte aq i dëshpëruar sa përfundoi në atë shtëpi të braktisur me një mik”, u shpreh avokatja, duke kërkuar një dënim me kusht me argumentin se ishte hera e parë që ai përballej me drejtësinë.
Pavarësisht kërkesës së mbrojtjes, gjykata vendosi t’i dënojë të dy shqiptarët me nga 18 muaj burg.
