"Natën e parë në qeli, i marrë forcërisht larg familjes dhe me idenë që sot në mëngjes im bir nuk do të shkonte në shkollë as me mua, as me të ëmën, e kam kaluar pa gjumë në sy"- kështu shkruan Erion Veliaj në reagimin e parë publik në rrjetin e tij social Facebook. Nga qelia ai shkruan se prokurori halucinant dhe pervers ka bërë akuza të pabaza pasi gjithçka e ka të deklaruar. "Por, dua të jini të sigurt se historia që po më tregon mua si një kriminel të korruptuar, i cili ka fshehur pasuri dhe pastruar para bashkë me të shoqen, është e sajuar nga një individ pervers, prokurori i çështjes tonë. Ai, për shembull, ka shkruar në akt-akuzën haluçinante se ime shoqe ka harxhuar mbi gjysëm milionë euro për blerje online fustanësh dhe bizhuterish. Faturimi i asaj shume në një akt-akuzë, si një lumë parash i derdhur për luks, është një perversitet kriminal"shkruan Veliaj, duke nënvizuar se kjo nuk është akuzë por opinion.
