Italia do të rifillojë transferimin e emigrantëve në Shqipëri në muajin janar, pas një vendimi të Gjykatës së Lartë të datës 19 dhjetor, që ka miratuar këtë proces. Kryeministrja italiane, Giorgia Meloni, njoftoi se Gjykata e Lartë ra dakord me qeverinë italiane lidhur me këtë çështje dhe theksoi se qeveritë duhet të përcaktojnë vendet e sigurta për mbajtjen e emigrantëve.
Transferimi i emigrantëve do të bëhet në kuadër të marrëveshjes të nënshkruar në 6 nëntor të vitit të kaluar mes kryeministres Meloni dhe kryeministrit shqiptar Edi Rama. Marrëveshja parashikon ngritjen e dy qendrave për procesin e verifikimit dhe mbajtjes së emigrantëve: një në Shëngjin, ku do të kryhen procedurat e verifikimit, dhe një tjetër në Gjadër, ku ata do të mbahen të izoluar deri në përfundimin e procedurave për azil.
Qeveria italiane do të ketë përgjegjësinë e plotë mbi veprimtarinë dhe juridiksionin e qendrave të pritjes. Kapaciteti maksimal i kampit për një vit do të jetë 36 mijë persona.
