Opozita shqiptare zhvillon sot, në orën 17:00, një tjetër protestë në Tiranë si pjesë e aksionit të saj për “mosbindje civile”. Protesta do të karakterizohet nga bllokimi i disa prej akseve kryesore të kryeqytetit për rreth 3 orë. Kryqëzime si Unaza e Vogël, rrethrrotullimi i Zogut të Zi, ura në Rrugën e Elbasanit, sheshi “Wilson” dhe segmenti nga Pallati me Shigjeta drejt Rrugës së Kavajës pritet të bllokohen nga protestuesit.
Kjo protestë shënon rikthimin e liderit të Partisë Demokratike, Sali Berisha, pas një mungese të gjatë në tubimet e opozitës. Ndërkohë, Policia e Shtetit ka paralajmëruar organizatorët se bllokimi i rrugëve përbën shkelje ligjore dhe përgjegjësi penale, duke theksuar se çdo tubim duhet të respektojë rregullat dhe ligjin për tubimet publike.
Policia ka njoftuar gjithashtu se bllokimi i akseve të rëndësishme dëmton rendin publik, pengon lëvizjen e lirë të qytetarëve dhe automjeteve, përfshirë ato të emergjencave, dhe krijon vështirësi për transportin publik dhe privat në Tiranë.
Në të njëjtën ditë, një protestë tjetër e opozitës do të mbahet në orën 15:30 para Ambasadës Shqiptare në Londër, si shenjë solidarizimi me situatën politike në Shqipëri. Sipas PD-së, protestat synojnë të kundërshtojnë qeverinë që ata e akuzojnë për lidhje me krimin.
Tirana pritet të jetë sot nën masa të rrepta sigurie për të menaxhuar situatën dhe shmangur përshkallëzimin e tensioneve.
