Një emërim i bërë nga Kuvendi në fund të vitit të kaluar ngre pikëpyetje mbi respektimin e Kodit Zgjedhor.
Bëhet fjalë për Ilirjana Nanon, e cila sipas faqes zyrtare të Këshillit të Lartë të Prokurorisë ushtron detyrën e Sekretares së Përgjithshme të KLP-së. Ndërkohë, më 6 nëntor 2025, Kuvendi e riemëroi atë në detyrën e Kryetares së Bordit Rregullator të Komisionit Qendror të Zgjedhjeve.
Në pamje të parë mund të duket një procedurë rutinë. Por vetë Kodi Zgjedhor parashikon një ndalim të qartë: nuk mund të kandidojnë persona që janë nëpunës civilë të nivelit të lartë.
Dhe pikërisht këtu lind dilema.
Sekretari i Përgjithshëm i KLP-së është një nga funksionet më të larta administrative në një institucion kushtetues. Në praktikë, është e vështirë të imagjinohet një status më i lartë në shërbimin civil sesa ai i Sekretarit të Përgjithshëm. Për këtë arsye lind pyetja nëse, në momentin e kandidimit dhe të emërimit në Bordin Rregullator të KQZ-së, Ilirjana Nano vazhdonte të ishte Sekretare e Përgjithshme e KLP-së.
Nëse përgjigjja është po, atëherë lind edhe një pyetje tjetër po aq e rëndësishme: si u tejkalua ndalimi që parashikon Kodi Zgjedhor?
Procedura e përzgjedhjes dhe verifikimit të kandidatëve kalon përmes strukturave të Kuvendit. Pikërisht për këtë arsye mbetet e paqartë pse nuk është evidentuar një ndalim që ligji e formulon shprehimisht për nëpunësit civilë të nivelit të lartë.
Kjo nuk është thjesht një çështje interpretimi, por një çështje që kërkon sqarim institucional. Çfarë statusi kishte Ilirjana Nano në datën 6 nëntor 2025, kur Kuvendi e emëroi Kryetare të Bordit Rregullator të KQZ-së? Dhe nëse ajo ishte ende Sekretare e Përgjithshme e KLP-së, mbi çfarë baze ligjore u konsiderua e lejueshme kandidatura dhe emërimi i saj?
