Deputeti, Erion Braçe, ka komentuar largimin e Marjana Koçekut nga PS, duke theksuar dallimet në perceptimin publik mes një largimi të saj dhe një të mundshëm të tij nga politika aktive.
I ftuar në emisionin “Shqipëria Live”, Braçe u shpreh se ai vetë nuk ka pse të dalë në protestë pasi si deputet ka në dorë "vendin ku mund t’i bëjë të gjitha". Megjithatë, kjo deklaratë ngre një pyetje të pashmangshme, nëse ai vërtet ka pushtet për të bërë gjithçka?! Pse pas kaq shumë vitesh në Kuvend nuk ka sjellë asnjë përmirësim për mijëra qytetarët që detyrohen të dergjen rrugëve?
Ironia qëndron edhe në faktin se vetë Braçe ka denoncuar publikisht që institucionet shtetërore nuk i përgjigjen as atij si deputet. Nëse administrata shpërfill një figurë veterane të pushtetit, mund të imagjinohet lehtë se çfarë përjeton një qytetar i thjeshtë. Këtë sjellje arrogante të sistemit Braçe nuk ka arritur ta ndryshojë, megjithëse pretendon se ndryshimi vjen pikërisht përmes ushtrimit të funksionit brenda asaj salle të ngrohtë.
Më tej, deputeti argumentoi se për Koçekun është e lehtë të largohet, ndërsa për të ky opsion nuk ekziston sepse ka milituar si "socialist i themelimit" dhe askush nuk do ta besonte si të pavarur. Por duke zgjedhur të qëndrojë besnik ndaj logos, ai pranon bashkëfajësinë për një parti që është larguar nga vlerat e saj fillestare dhe e kthyer në një organizatë që i shërben një grushti personash. Për më tepër, prej 13 vitesh në pushtet tashmë, mban në kurriz aferat më të mëdha korruptive në disa nivele qeverisë.
Braçe e pranon se njerëzit në protestë janë të papërfillur dhe se po u vritet e ardhmja, por zgjedh të mbetet pjesë e makinerisë që i merr këto vendime, duke preferuar rolin e kritikut pa kosto, ndërsa në praktikë ndryshimi për qytetarët mbetet zero.
