Sot është dita e parë e punës së drejtorit të ri të policisë. Ilir Proda “fitoi” konkursin e shpallur nga ministri pa konkurs, Ervin Hoxha, i cili dje, duke justifikuar pastërtinë e figurës së drejtorit të ri, deklaroi në mënyrë të hileqare: “Fakti që të gjitha organet ligjzbatuese u pyetën në një kohë rekord dhe përgjigjja e tyre ishte shumë e shpejtë, kandidaturat janë verifikuar nga çdo organ ligjzbatues dhe pastërtia e tyre është në përputhje të plotë me ligjin.”
Në fakt, ministri e di shumë mirë se përgjigja e SPAK ka qenë se ndaj Ilir Prodes nuk është regjistruar hetim, por se telefoni i tij është ende duke u verifikuar. Procesi i verifikimit nuk ka përfunduar ende, për sa kohë telefoni i Prodes ndodhet ende në SPAK. Komisioni që e vlerësoi zotin Proda dhe që përbëhet nga policë, e di shumë mirë se nëse një telefon është sekuestruar dhe po verifikohet, dyshimet janë jo të vogla. Dhe këtu bëhet fjalë për SPAK, që heton krimin dhe korrupsionin në nivelet e larta, jo për një prokurori të thjeshtë.
A nuk duhet ta merrte në konsideratë komisioni këtë gjatë vlerësimit të kandidatëve? Sekuestrimi i telefonit për dyshime që lidhen me dekonspirimin e informacionit për krimin e organizuar do të rrezonte emërimin e një polici të thjeshtë, jo të këtij niveli.
Ilir Proda është një nga drejtuesit e policisë, të cilit i është sekuestruar telefoni për shkak se SPAK dyshon se ai, si drejtues i policisë së Elbasanit, mund të ketë nxjerrë sekretin hetimor përpara se vendimi i gjykatës të vihej në ekzekutim.
Të shpresojmë që drejtori i ri i policisë të ketë gjetur një telefon dhe një numër të ri për të nisur sot detyrën, pa mbyllur ende mirë “hesapet” me verifikimin që po kryen SPAK ndaj tij.
