Tensionet kanë përfshirë seancën parlamentare. Ministri i Brendshëm, Ervin Hoxha, mbrojti veprimet e Policisë së Shtetit në një përplasje të fundit përpara Kuvendit, duke e akuzuar deputetin e opozitës, Gazment Bardhi, si një “përsëritës gënjeshtar”.
“Për shkak të analizës psiko-kriminale që unë kam detyrë të bëj, ti hyn te njerëzit recidivistë, përsëritës, gënjeshtarë. Që ti gënjen dhe akuzon, e më pas u beson vetë atyre akuzave që nxjerr, është e vërtetë. Policia e Shtetit ka bërë detyrën e saj, nuk ka hyrë në Kuvend. Turma që drejtoje ti po sillej drejt institucioneve kushtetuese, dhe policia ishte në detyrë për të mbrojtur Kuvendin,” deklaroi Hoxha.
Por, reagimi i Gazment Bardhit erdhi menjëherë, me akuza të forta ndaj ministrit Hoxha, duke e cilësuar atë si një përzgjedhje të bandave të Durrësit. Bardhi theksoi se vëllai i ministrit dhe lidhjet e tij me banda kriminale do të ekspozohen së shpejti.
“Turmë je ti dhe çeta e hajdutëve që të rrethon, përfshirë edhe vëllain tënd, i cili do të marrë në qafë veten dhe Belinda Ballukun. Shumë shpejt do të kuptosh përse po e them këtë. Ai është një hajdut në OSHEE, që vjedh paratë e qytetarëve. Ju jeni tufë, jo ne deputetët e opozitës. A ke lexuar mesazhin që të dërgoi Edi Rama apo bandat e Troplinëve të Durrësit? Ti je ushtar i tyre dhe i zgjedhur me marrëveshje nga bandat për të qenë ministër i Brendshëm. Kjo është e vërteta, e njohur nga të gjithë,” tha Bardhi.
