Kryetari i Grupit Parlamentar të Partisë Demokratike, Gazment Bardhi, deklaroi se opozita nuk respekton Presidentin e Republikës, Bajram Begaj, duke e akuzuar se është i rreshtuar në krah të kryeministrit.
“Meqë na bëre thirrje për të respektuar shkëlqesinë e tij Bajram Begajn, po them që Presidenti i Republikës nuk gëzon asnjë respekt nga opozita për aq kohë sa sillet si ushtar i kryeministrit,” u shpreh Bardhi. Ai kritikoi Presidentin për mosndërhyrjen ndaj ambasadorëve shqiptarë që, sipas tij, janë të përfshirë në fushata të Partisë Socialiste. Bardhi përmendi një aktivitet në Selanik, ku ambasadorja shqiptare ishte e pranishme ndërsa kryeministri fyeu opozitën dhe kërkoi vota për PS, duke theksuar se një veprim i tillë është i ndaluar me ligj.
Bardhi gjithashtu akuzoi Presidentin se gjatë vizitave të tij mban pranë përfaqësues të Partisë Socialiste të lidhur me krimin e organizuar, duke theksuar se Presidenti duhet të përfaqësojë unitetin e popullit dhe të qëndrojë larg fushatës zgjedhore. Ai e akuzoi gjithashtu për përfitime të padrejta, duke pretenduar se Presidenti po kërkon leje ndërtimi për vila në këmbim të favoreve nga qeveria, paralajmëruar se opozita do ta kundërshtojë këtë.
