Kreu i Grupit Parlamentar të Partisë Demokratike, Gazment Bardhi, i ka kërkuar dorëheqjen Elisa Spiropalit nga posti i kryetares së Kuvendit, pas vendimit të Gjykatës Administrative që shfuqizoi vendimin për përjashtimin e deputetëve të opozitës.
Bardhi theksoi se ligjvënësit demokratë u ndaluan të hyjnë në Kuvend, duke iu bllokuar hyrja me kangjella hekuri dhe forca sigurie. Ai e cilësoi këtë veprim në kundërshtim me Kushtetutën, duke kërkuar përgjegjësi për shkeljen e të drejtave të deputetëve të opozitës.
“Duhet të dorëhiqeni, nuk keni lejuar opozitën të marrë pjesë në seancë në kundërshtim me vendimet e Kushtetueses, I vendosët deputetëve kangjella hekura e forca sigurie. Futët edhe forcat speciale për të ndaluar deputetët të futen brenda në Kuvend. Ti atje lart në majë, që je përfaqësuese e kriminelëve, duhet të dorëhiqesh. Nxirr Gardën jashtë. Duhet të ndjeni turp bashkë me zonjën e vezëve. Duhet të jepni dorëheqjen. Nuk mund të vazhdosh më të ulesh në atë karrige." tha Bardhi
