Gjykata Kushtetuese pritet të bëjë publike ditën e sotme në orën 15:00 vendimarrjen e saj mbi kërkesën e ish-kryeministrit Sali Berisha për përjashtimin e gjyqtares kushtetuese Marsida Xhaferllari nga seanca e datës 19 nëntor, me pretendimin se ka konflikt interesi. Do të jetë kryetarja e Gjykatës Kushtetuese Holta Zaçaj që përmes një komunikimi me median do japë edhe vendimin e arsyetuar.
"Në takimin sot do ju komunikohet edhe vendimmarrjen e trupës në lidhje me kërkesën për përjashtimin nga shqyrtimi i çështjes së Berishës të gjyqtares Marsida Xhaferllari"-thuhet në njoftimin e Kushtetueses.
Sipas Berishës, Xhaferllari duhet të përjashtohet pasi është partnerja e Enkelejd Alibeajt, me të cilin Berisha ka pasur përplasje politike.
Më 19 nëntor, Gjykata Kushtetuese pritet të shqyrtojë ankimin e Berishës kundër masës së detyrimit për paraqitje të vendosur ndaj tij nga SPAK.
