"Ne kemi pasur një rritje të kredisë me bazë vjetore në nivelin e 15% dhe brenda kësaj rritje, vetëm kredia në lekë është rritur në nivelin e 20%. Kjo rritje ka qenë e njëtrajtshme si për individët ashtu edhe për bizneset”, tha Gent Sejko.
Banka e Shqipërisë e vlerëson zhvillim pozitiv zgjerimin e kredi-dhënies, ndikuar kryesisht nga kërkesa për hua për blerje banesash. Por sipas guvernatorit, kjo ecuri mund të mos zgjasë përgjithmonë.
“Rreziku kryesor që përballet sektori financiar dhe ai bankar është rreziku i kredisë... sikurse e thash rreziku i kredisë ka qenë i kontrolluar, ka ardhur në rënie sipas analizave, por disa elementë janë për t’u vlerësuar dhe për t’u adresuar dhe këto ishin si objekt i analizës së Këshillit Mbikëqyrës”, tha Sejko.
Pas mbledhjes së Këshillit Mbikëqyrës, që miratoi Raportin e Stabilitetit Financiar për gjashtëmujorin e parë 2024, guvernatori i Bankës së Shqipërisë, Gent Sejko tregoi edhe mbi masat që po merren për mbrojtjen e huamarrësve veçanërisht në institucionet financiare jo-banka.
Këshilli Mbikëqyrës i Bankës Qendrore vlerësoi se rreziqet për zhvillimet ekonomike dhe financiare në vend mbeten të pranishëm, kryesisht nga zhvillimet gjeopolitike në botë.
