Ambasadori i Bashkimit Evropian në Shqipëri, Silvio Gonzato, ka vlerësuar punën e Prokurorisë së Posaçme (SPAK) në kuadër të 5-vjetorit të krijimit të saj. Gjatë një ceremonie festive, Gonzato theksoi se SPAK është një nga elementët më të rëndësishëm të Reformës në Drejtësi, duke e konsideruar atë si simbol të suksesit në luftën kundër korrupsionit dhe krimit të organizuar.
“SPAK është sinonim i suksesit në Shqipëri. Qytetarët besojnë se ky është institucioni më i besuar. Duhet të jeni krenarë për atë që keni arritur, por nuk duhet të ndaleni këtu, duhet të shikoni përpara,” tha Gonzato.
Ai vlerësoi përpjekjet e SPAK, pavarësisht burimeve të kufizuara dhe sfidave me të cilat është përballur, duke përmendur kulturën e pandëshkueshmërisë dhe ndërhyrjet politike në të kaluarën.
Gonzato shtoi se Reforma në Drejtësi, ku SPAK është një element kyç, ka hapur rrugën për integrimin e Shqipërisë në Bashkimin Evropian. “Kjo javë ka qenë mjaft pozitive për Shqipërinë, duke filluar me hapjen e grup-kapitullit të pestë të negociatave dhe Samitin BE-Ballkani Perëndimor. Sot festojmë një nga shtyllat e rëndësishme të reformës që e ka bërë të mundur këtë progres,” përfundoi ai.
